Djasabra mainta 10 di yanüari, un kantidat di 45 boluntario a subi boto pa bai limpia den e bahia di Fuik. Despues ku siman pasá tabatin e famoso ‘Fuikdag’, a bira un kustumber ku e djasabra despues, Curaçao Clean Up ta organisá un mainta di limpiesa den e bahia.

Un tim di 35 sambuyadó a bai limpia den fondo di laman mientras ku na otro banda di e bahia komo 10 boluntario a kana den awa, kantu di e strep i limpia tur e shushi ku a drif bai pega den e mangrovenan. En total a yena un 40 saku ku shushi ku ta mas o menos un 500 kilo di shushi debí na e artefaktonan di heru i glas ounke ku e plèstik tabata dominá.

E hayasgonan mas remarkabel den laman e aña aki tabata un flètskrin, un drone, partinan di seadoo i tradishonalmente a haña un kantidat di brel di solo.

Curaçao Clean Up ta yama DANKI na tur e boluntarionan ku a sakrifiká nan dia liber i a hasi un tremendo trabou. DANKI na Curacao Dive taskforce di Casha Curacao ku a partisipá ku 4 divecenter, Divecenter CURious2DIVE, Rebel Diving, Scubaçao i Unique Diving

DANKI na Coca-Cola Curaçao & Bonaire, Irie Tours, Selikor NV i Citro Curacao ku a koperá pa e mainta di limpiesa a bira posibel. Curaçao Clean Up ta sigui hasi un yamada na komunidat pa bira mas konsiente pa tene nos isla limpi, tantu riba tera komo den laman. Pa mas informashon di Curaçao Clean Up, por bishitá nos wèpsait www.curacaocleanup.com òf sigui nos via facebook/instagram.