Curacao Clean pa di 10 aña ku akshon di limpiesa na Klein Kòrsou

Djasabra mainta último, mas o ménos 100 boluntario a sali ku Mermaid pa un akshon di limpiesa  grandi na Klein Kòrsou. Den kolaborashon ku diferente ‘touroperator’ di Klein Curaçao Conservation (KCC), Selikor i e White Tip di Curaçao Industrial Divers, M&B Maintenance and Repair, e operashon grandi aki a bira posibel.

Ta pa di 10 aña ku Curaçao Cleanup ta e motòr tras di e inisiativa aki pa piki tur plèstik na kosta di e isla. A parti e trabounan entre diferente tim dirigí pa un kapitan, pa mihó efisiensia. Ademas di plèstik, tabatin parti di boto kibrá, kabuya di boto basta largu i hasta dos frishidèr. A limpia e area rondó di e faro tambe i a remplasá algun tabla kibrá di e vlur pa prevení aksidente. Danki na e akshon anual grandi aki, sostené pa e akshonnan di limpiesa semanal ku boluntario di Sea Turtle Conservation Curaçao, Klein Kòrsou ta keda mas o ménos bou di kontròl kontra e shushi ku ta bin fo’i laman.

Curaçao Clean Up ta mira bèk ku hopi satisfakshon riba un dia di limpiesa hopi éksitoso, ku tabata posibel danki na e esfuerso fenomenal di tur partido ku a traha huntu i e tremendo grupo di boluntario.