World Clean Up Day 2024 tabata un éksito atrobe, danki na tur superheroe!

E di 12 edishon di e akshon nashonal di limpiesa di mas grandi riba nos isla, World Clean Up Day Kòrsou tabata un éksito atrobe. Un akshon ku su meta ta pa keda konsientisá pa un isla mas limpi, ku e aña aki tabata 2 dia. Danki na tur e boluntarionan ku a registrá komo organisashon/kompania, individual i spònsernan ku a kontribuí pa e dia tabata un éksito atrobe. Djabièrne 20 Sèptèmber i Djasabra 21 di sèptèmber a tuma lugá e di 7 ‘World Clean Up Day’ 2024 i Kòrsou tambe a forma parti, huntu ku 191 pais mas, na e evento di boluntario di mas grandi na mundu. Fundashon Curaçao Clean Up ta hopi satisfecho kon e 2 maintanan di limpiesa a bai rònt Kòrsou for di Bandariba te Bandabou. 2 dia ku hopi boluntario a kombertí den un evento sosial tantu di famia komo di trabou.

Mas ku 2.500 superheroe a partisipá na e mainta di limpiesa na komo 78 lokashon den tur bario di Kòrsou. Ademas 75 sambuyadó superheroe di 17 skol di sambuyá a piki shushi den laman na 16 playa di nos isla. Den transkurso di siman nos lo tin e kantidat di kilo definitivo. DANKI na e kantidat grandi di boluntario, for di mucha te ku hende grandi hopi motivá i ku hopi alegria i energia, e aña aki atrobe a hasi limpiesa tantu riba tera komo den laman. Tambe nos kordinadónan di area ku a hasi un tremendo trabou. Danki na komersio ku a respondé riba nos yamada. Tur otro instansia, bario, gruponan sosial i deportivo, skol i individualnan ku a partisipá ku hopi amor pa hasi nos isla mas limpi. Danki spesial na PRENSA, Ministerio di GMN, Selikor.Tambe na tur kontratista di ekipo pisá ku a duna un tremendo kontribushon riba e dia aki atrobe. Sin nan ayudo, e dia aki lo no tabata posibel.

Fundashon Curaçao Clean Up, ta spera ku despues di 12 aña lo bin mas akshon i kontròl pa berdaderamente nos tur ku ta kontribuí, mira un kambio. Pa medio di un lei nos mester por konsientisá komunidat kompleto pa resiklá hopi mas, enbes di tira shushi for di outo òf den mondi. No mester prohibí so, mester keda konsientisá i kuminsá mira e balor di shushi tambe.

Ban spera ku despues di djabièrnè I djasabra último, nos lo sa pa mantené Kòrsou limpi. Un isla limpi ta na bienestar di nos salú i nos ekonomia. Kòrsou ta di nos tur i ta nos tur tin ku mantené limpi i sigui tene nos wowo habrí pa kada sushi ku nos mira rònt di nos i sigui tuma akshon, huntu ku bo famia, bisiña o kolega. 

Ta huntu nos por logra esaki i sigui konsientisá otro pakiko nos mester biba riba un isla limpi.

Atentamente,

Fundashon Curacao Clean Up

Myrthe Verhulst
+599 9 540 2923

Sharo Bikker
+599 9 515 4169