Korsou tin un sentro pa resiklá mas, awor den área di Saliña

Curaçao Clean Up huntu ku Ofisina di Turismo di Kòrsou (CTB) ta inougurá sentro pa resiklá plèstik i aluminio na Best Buy Supermarket

Djaweps 18 di yüli 2024, Minister di Desaroyo Ekonómiko, sr. Ruisandro Cijntje, sr. Andre Rojer, Product Manager di Curaçao Tourist Board, Corinne Senior, tesorero di Curaçao Clean Up i sr. William Li, gerente di Best Buy Supermarket Curaçao a hiba palabra na e akto di inougurashon di e sentro pa resiklá. E sentro pa resiklá ta situá riba e lugá di parker na banda dje edifisio di Best Buy Supermarket, Junostraat.

Fundashon Curaçao Clean Up den su afan pa sigui konsientisá pa un Kòrsou mas limpi a aserká tantu Curaçao Tourism Board i Best Buy Supermarket pa un koperashon pa por realisá un sentro mas pa resiklá. Mesora CTB a bai di akuerdo, mirando ku esaki ta kuadra ku nan kampaña di konsientisashon ‘Kòrsou ta dushi i limpi’ kual tin komo meta pa logra un Kòrsou mas limpi i pa alabes stimulá pa mas hende resiklá. Gerensia di Best Buy Supermarket no a duda pa fasilitá su lugá di parker.

A skohe e lugá di parker di e supermerkado debí ku Curaçao Clean Up ta haña ku ta un sitio sentral i mester sigui konsientisá e balor di resiklá den mas bario.

Awor habitantenan di tantu Saliña, Dominguitu i besindario, tin un sentro pa resiklá mas serka di nan. Por tira tur loke ta bòter di plèstik di diferente kategoria i bleki di aluminio limpi den e kònteiner. Tin diferente sekshon ku ta indiká eksakto kiko por tira den kada buraku di e kònteiner. Ta hasi un apelashon na un i tur pa lesa kada plachi pa tira e bòternan di plèstik den e buraku korekto.

Fundashon Curaçao Clean Up ta gradisí CTB i Ministerio di Desaroyo Ekonómiko (MEO) ku semper a kere den e proyektonan di e fundashon i Best Buy Supermarket pa nan koperashon pa habri e sentro di resiklá riba su tereno, ku sigur lo kontribuí na un Kòrsou mas limpi.